Viana do Castelo quere crear un gran clúster do automóbil para atraer grandes industrias do noroeste
A proposta pretende atraer á gran industria do automóbil dos dous países para fornecer a marcas como Peugeot ou Citroën. Queren aproveitar a deslocalización das empresas galegas que nos últimos anos se están instalando no norte do país veciño grazas aos incentivos fiscais e a man de obra máis barata.
- Porque marchan as empresas galegas para Portugal?
- Portugal recoñece a deslocalización de empresas galegas cara o seu territorio
Por Galicia Confidencial | Viana do Castelo | 06/05/2018 | Actualizada ás 22:00
O alcalde de Viana do Castelo quere crear neste concello que está a 20 quilómetros da Guarda un gran cluster do automóbil de Galicia e do Norte de Portugal. Unha propsota que xa lle trasladou ao Ministerio da Economía portuguesa para converter a rexión do Alto Minho portugués no gran polo automobilístico do noroeste da península.
O alcalde xustificou a creación deste cluster no feito de que nos últimos anos esta rexión está a atraer numerosas empresas galegas do sector automóbil que fornecen de material a marcas como a Peugeot e Citroën. "Estas empresas constitúen unha gran forza empregadora e exportadora. Sería interesante crear unha asociación das mesmas para atraer máis investigación e desenvolvemento para o territorio", suliñou.
A idea do autarca portugués vai en sintonía coa manifestada tamén por empresarios da rexión que ven na emigración de empresas galegas a Portugal unha gran oportunidade para crear no norte de Portugal o gran polo da automoción de todo o noroeste da Península Ibérica. A prosposta tamén recolle máis investimento por parte de Lisboa e tamén unha reformulación da formación profesional e dos cursos superiores dos Institutos Politécnicos para que se especialicen nesta área de actividade industrial.
DESLOCALIZACIÓN DAS EMPRESAS GALEGAS
Empresarios e rexedores do Alto Minho cren que este cluster axudaría a crear aínda máis emprego e atraer a novas empresas galegas con novos incentivos fiscais. De feito, nos últimos anos, especialmente nos anos duros da críse, renaceu a industria automobilística en Portugal grazas ás deslocalizacións das empresas galegas que se instalan en zonas fronteirizas. De feito, a compra e a fabricación de compoñentes para automóbiles, principalmente para PSA, aumentou un 53% no país veciños.
En Portugal foron creadas, a través de traslados ou por procesos de expansión, 240 empresas do sector de pezas para a industria automóbil, das cales 168 (70%), están localizadas no norte do país, principalmente en polígonos industriais de zonas fronteirizas, como o de Campos, en Vilanova da Cerveira.
Tal foi o aumento das empresas deste ramo que en 2007 xerou 7.700 millóns de euros en Portugal, segundo datos presentados pola Asociación de Fabricantes para a Industria Automóbil de Portugal(AFÍA). E o 25% desa cifra de exportacións foron para España, sendo Galicia o principal mercado luso no conxunto do estado. Só o sector do automóbil moveu máis de 2.000 millóns.
BAIXOS CUSTES E PROXIMIDADE
Os baixos custes e a proximidade xeográfica de Portugal permitiron que este país sexa agora o segundo maior punto de orixe de pezas e compoñentes automóbiles para Galicia. O pasado ano exportaron 159,4 millóns de euros en compoñentes para automóbiles. Unha cifra que só foi superada polos 2.548 millóns de euros de Francia, país de orixe do grupo PSA.
