Por E.P. | A CORUÑA | 14/06/2018 | Actualizada ás 13:38
O Foro Económico de Galicia alertou do "problema serio a longo prazo" que suporá a emigración de mozos galegos e instou a "tomar medidas hoxe" para que poidan notarse os efectos "en 2030". Mentres, ratifica o crecemento da economía galega, pero con "precariedades".
Así o asegurou o catedrático de Economía Aplicada da Universidade de Vigo (Uvigo), Santiago Lago, director do Foro Económico de Galicia, unha plataforma integrada por profesores do tres universidades galegas, empresarios, directivos e xornalistas especializados en divulgación económica.
Á presentación do Anuario 2018, asistiron tamén o presidente do Foro, Emilio Pérez Neto; o editor do Anuario, José Luís Gómez e o catedrático de Economía Aplicada da Universidade da Coruña (UDC), Fernando González Laxe. Entre outras cuestións, o estudo lembra que o Produto Interior Bruto (PIB) creceu en Galicia en 2017 un 3,1%, "ao mesmo ritmo que a media española". "E o que é máis importante volveu ao nivel previo á crise de 2008", engade.
Na análise de conxuntura, a cargo dos profesores Fernando González Laxe, José Francisco Armesto, Patricio Sánchez e Santiago Lago, estes expertos inciden no "bo comportamento" da economía galega en 2017 e apuntan que se trasladou ao mercado de traballo."Onde, por terceiro ano consecutivo, Galicia presenta tanto un incremento da ocupación como unha redución do desemprego especialmente significativa no caso do paro de longa duración".
"LUCES E SOMBRAS"
En canto aos resultados económicos, o director do Foro Económico mostrou "serias dúbidas" de que os datos da economía galega se poidan manter "outros quince anos, se a demografía non cambia". Mentres, alertou da "marcha de xente nova". "Hai que porse as pilas", sinalou ao reclamar medidas para abordar esta cuestión.
Tamén no Anuario alértase da existencia de "luces e sombras" e "precariedades", entre elas as cifras que aínda hai de paro ou que a demanda interna "siga sendo o principal motor de crecemento da economía galega". "A produtividade está baixa en Galicia aínda que se está investindo", apuntou González Laxe, quen asegurou que o camiño para reverter esta situación pasa, entre outras solucións, pola dixitalización.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.