O Pazo de Meirás, de novo á venda nunha inmobiliaria por 8 millóns de euros

A familia Franco volveu a poñer á venda o Pazo de Meirás a través da inmobiliaria cántabra Mikeli, na que se oferta o histórico inmoble localizado no municipio de Sada (A Coruña), que foi utilizado como residencia de verán por Francisco Franco, por unha cantidade de oito millóns de euros, a mesma cifra que se pedía no primeiro anuncio que se publicou en febreiro deste ano.

A inmobiliaria de luxo volve recoller na súa páxina web a venda do Pazo, tres semanas despois de que todos os grupos políticos con representación no Parlamento de Galicia acordaran en xullo urxir á Xunta a que inste o Goberno do Estado a que inicie as accións legais para que se recupere a titularidade pública do Pazo, de acordo con dous informes que acreditan a viabilidade desta reclamación.

A web inmobiliaria anuncia o Pazo como un "inmoble singular". "Atopámonos, pois, ante un recinto sen par, cheo de historia e detalles especiais (biblioteca, cadros, pezas arqueolóxicas, dependencias, brasóns, fontes, cruceiros, decoración, etc.) que o converten nunha oportunidade inmellorable", recóllese na publicación.

A continuación, resáltase que "o Pazo de Meirás é unha paradigma de confort e contacto coa natureza". Na descrición do inmoble destácanse "a balaustrada corrida do segundo piso e os ocos en esquina da seguinte planta baixo dinteles de cantaría rematados en arco labrado na mesma peza. O balcón cuberto da Torre da Quimera é tamén factor singular da fachada".

Ademais, faise referencia ás "tres ménsulas ou modillones, con balaustrada de remate macizo sobre columnas de tamaño pequeno" que sustentan o balcón e "onde existen elementos ornamentais de épocas precedentes".

SEN REFERENCIAS AO PAZO COMO BIC

Na súa descrición do inmoble, en cambio, non se recolle que se trata dun Ben de Interese Cultural (BIC), como está declarado oficialmente desde o ano 2009. Nesta ocasión, tampouco se fan referencias á familia Franco na publicación.

O Pazo de Meirás era a residencia da escritora Emilia Pardo Bazán, pero pasou a mans de Francisco Franco como particular despois de que unha comisión, no ano 1938, impulsase unha "colecta popular" para regalarllo ao ditador.