O Camiño rexistrou 27 infraccións penais durante o 2017

Un total de 27 infraccións penais, na súa maioría furtos menores, rexistráronse no Camiño de Santiago ao longo do ano 2017, exercicio no que se alcanzou unha cifra histórica de peregrinos, con 301.000 camiñantes.

Diso informou este xoves a directora de Turismo de Galicia, Nava Castro, durante a Comisión de Industria, Enerxía, Comercio e Turismo da Cámara galega, na que deu resposta a unha pregunta formulada polo deputado socialista José Manuel Pérez Seco sobre o cumprimento das medidas que contempla o Plan director do Camiño para garantir a seguridade dos peregrinos.

Segundo destacou Nava Castro, este baixo número de infraccións evidencia que "o plan director funciona" e que "o Camiño é un espazo seguro, cun número de accidentes mínimo e un índice de delitos menor ao da media galega".

Así mesmo, subliñou que o Plan Director do Camiño de Santiago inclúe seis accións principais e 21 medidas específicas para velar pola seguridade das persoas que realizan a Ruta Xacobea. Entre outras, citou a elaboración dunha Guía do Peregrino con información útil en casos de emerxencia, consellos prácticos para a realización do Camiño ou medidas de autoprotección.

E é que, conforme sinalou Nava Castro, a seguridade do peregrino é un obxectivo "principal" para o Goberno galego, motivo polo que a Xunta tamén puxo en marcha outras medidas como o reforzo da coordinación entre as forzas e corpos de seguridade a través dun convenio coa Secretaría de Estado de Seguridade, a posta en marcha dunha comisión de seguridade viaria no Camiño, así como un convenio coas agrupacións de protección civil para prestar unha "mellor atención" aos camiñantes.