O 112 Galicia atendeu preto dun centenar de incidencias por choivas
A maioría dos avisos estaban relacionados coa caída de árbores, desprendementos de terra e pedras ou formación de balsas de auga na estrada.
Por Europa Press / Redacción | SANTIAGO DE COMPOSTELA | 15/12/2018 | Actualizada ás 20:01
O Centro Integrado de Atención a Emerxencias (CIAE) 112 Galicia contabilizou até as seis da tarde preto dun centenar de incidencias relacionadas coas choivas.
Aínda que ningunha das incidencias resultou ser de gravidade, as precipitacións recollidas na comunidade durante o día provocaron, especialmente, caída de árbores, desprendementos de terra e pedras e formación de balsas de auga nas estradas.
Segundo informa o 112, en Rianxo foi necesaria a intervención dos bombeiros para axudar a un home atrapado co seu vehículo nunha balsa de auga, que lle impedía saír do coche, arredor das 17,30 horas da tarde, na parroquia de Taragoña, concretamente, nunha ponte sobre o río Te. Afortunadamente, o home atopábase en perfecto estado de saúde, polo que rexeitou recibir asistencia médica.
Polo demais, as zonas nas que se rexistrou o maior número de incidentes foron os concellos de Boiro, Outes, Lousame e Padrón, na provincia da Coruña, e en Vigo, Sanxenxo e Redondela, na de Pontevedra. En menor medida, con casos puntuais e de escasa importancia, tamén se viron afectados concellos na provincia de Lugo.
