Vídeo: o mal tempo complica a busca do tripulante desaparecido no afundimento do 'Sin Querer II'
Guillermo Casais permanece desaparecido desde o afundimento do pesqueiro a 4,5 millas ao sur de Fisterra, na tarde do pasado mércores.
Por Europa Press / Redacción | SANTIAGO DE COMPOSTELA | 21/12/2018 | Actualizada ás 09:50
O mal tempo complica a procura de Guillermo Casais, o tripulante do 'Sin Querer II' que permanece desaparecido desde o afundimento do pesqueiro a 4,5 millas ao sur de Fisterra (A Coruña) na tarde do pasado mércores.
Segundo fontes de Salvamento Marítimo, o buque 'Don Inda' ía retomar o rastrexo pola enseada de Corcubión en canto aumentase a visibilidade, "moi escasa" a primeira hora da mañá. Mentres, estudaban se sería posible a utilización de medios aéreos, que este xoves si se sumaron ao operativo.
Por terra, o dispositivo de procura si volverá contar na xornada deste venres con efectivos de Protección Civil de Fisterra e Carnota.
No naufraxio deste pesqueiro faleceron tres tripulantes e outro seis lograron ser rescatados con vida. Poucas horas despois deste accidente, cuxa investigación apunta a dous golpes de mar como causantes, produciuse outra traxedia tamén na costa coruñesa, neste caso no propio porto de Malpica, onde o envorco de 'A Silvosa' saldouse coa morte do patrón, José Ángel Sanjurjo.
