Lourizán despide o ano con uvas reivindicativas
Os veciños de Lourizán participaron este domingo nun fin de ano anticipado na Praza dos Praceres de Pontevedra tomando doce uvas reivindicativas ao son das badaladas que marcaba a igrexa parroquial.
Por Galicia Confidencial | Pontevedra | 31/12/2018 | Actualizada ás 10:31
Foi un novo acto simbólico co que a veciñanza quería denunciar a situación da parroquia e do concello polo que cada uva representaba unha das “doce aberracións máis importantes que leva sufrindo desde fai décadas”.
Cada uva representaba as problemáticas de Ence, Elnosa, a autovía, a EDAR, a depuradora de Ence, a subestación eléctrica da Gandarela, a variante de Marín e Rotonda de Cocheras, o tren pola Praza, os recheos do Porto de Marín, o escaléctrix de Praceres, o novo emisario submarino e a ampliación da EDAR
“A veciñanza confía que o sentido común se impoña e as dúas últimas non se cheguen a materializar. E iso precisamente é o que lle piden ao novo ano”, apunta nun comunicado.
