En Marea reclama "políticas serias" para atender a persoas con dano cerebral
A deputada Paula Vázquez Verao critica á Xunta por "incumprir" o acordo de construción dun centro público de rehabilitación de ictus. Iso provoca, di, que estes pacientes sexan derivados a outros centros non especializados e con "lista de espera".
Por E.P. | SANTIAGO DE COMPOSTELA | 10/01/2019 | Actualizada ás 13:11
En Marea preguntará no pleno do Parlamento galego acerca de cando a Xunta vai apostar por "políticas serias" para atender as necesidades de persoas con dano cerebral adquirido.
A deputada Paula Vázquez Verao censura o "incumprimento" por parte da Xunta do acordo aprobado por unanimidade na Cámara no que se instaba á construción dun centro público de rehabilitación en Galicia antes do fin do pasado ano.
Vázquez Verao censura que, ao non haber un centro para a rehabilitación específica de ictus de longa estancia, este tipo de pacientes son derivados a outros centros con "lista de espera" que prexudica a súa mellora. "A realidade galega é que as familias teñen que asociarse para acceder a recursos de rehabilitación e estes son escasos, recaendo o coidado e apoio a estas persoas na contorna familiar, sobre todo en mulleres", asegura Paula Vázquez Verao.
Respecto diso, En Marea expón que o dano cerebral adquirido en xeral e o ictus en particular é a primeira causa de morte feminina en Galicia e de discapacidade en persoa adulta. Isto supón un 13,1% de incidencia na comunidade, fronte ao 9,3% no conxunto do Estado. Segundo a Federación Galega de Dano Cerebral (Fegadace), en Galicia hai unhas 35.000 persoas nesta situación, das cales case o 80 por cento están motivadas por ictus.
