Por E.P. | SANTIAGO DE COMPOSTELA | 19/01/2019 | Actualizada ás 20:16
A cidade da Coruña promocionarase na próxima edición da Feira Internacional de Turismo (Fitur) cun programa que virará ao redor da Torre de Hércules, con motivo do décimo aniversario da declaración deste faro romano como Patrimonio da Humanidade.
A próxima edición da feira comeza o mércores 23 en Madrid. Alí, o alcalde da Coruña, Xulio Ferreiro, presentará unha oferta turística que recordará "os milenios de luz do faro romano sobre a cidade, con actividades culturais e variadas, e que se sumarán a unha oferta xa de seu rica e que non deixa de crecer", destacou o presidente do Consorcio de Turismo e concelleiro, Alberto Lema.
O obxectivo será mostrar as "virtudes" da Coruña como "destino atlántico", non só cunha gastronomía e unha oferta "cultural excelentes", senón con características e solvencia demostrada para acoller "grandes eventos e turismo especializado".
O edil recordou que este 2019 A Coruña celebrará unha nova edición do Forum Gastronómico e "un festival consolidado como é o Noroeste Estrella Galicia, que xa ten anunciada a unha figura internacional e sobresaliente, Patti Smith".
O concelleiro destacou que a programación turística da cidade vai acompañada de crecemento do aeroporto de Alvedro, que "pechou o segundo mellor ano en cifras de pasaxeiros da súa historia, con 1'22 millóns, e que mantén as expectativas de crecemento neste ano, con novas rutas e máis frecuencias".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.