Por Europa Press / Redacción | SANTIAGO DE COMPOSTELA | 21/01/2019 | Actualizada ás 15:30
O portavoz parlamentario do PPdeG, Pedro Puy, negou que o partido teña dado "un xiro á dereita" tras a Convención Nacional celebrada este fin de semana en Madrid e valorou "moi positivamente" o evento.
"Non hai ningún xiro á dereita. En absoluto. O Partido Popular, desde a súa fundación, trata de conformar unha maioría arredor dun conxunto de ideas que son as liberais, conservadoras e reformistas do conxunto de España", asegurou Puy este luns.
Neste sentido, apuntou que o PP se reafirmou "como a casa máis representativa, a casa común do centro dereita democrático de España" e sinalou ter unha sensación "moi positiva" da convención.
"A convención foi un magnífico expoñente de cales son as ideas do Partido Popular, que son as liberais, conservadores e reformistas", destacou Puy, quen sentenciou que o PP é "a alternativa clara á esquerda".
DISCURSO "RANCIO"
Pola súa banda, a portavoz nacional do BNG, Ana Pontón, referiuse este luns á convención do PP. Neste sentido, subliñou que no evento "se consagrou o vello PP de Aznar".
"Non escoitamos falar nin de feminismo, nin de violencia de xénero, nin da loita das mulleres, senón que máis ben escoitamos un discurso rancio", destacou a portavoz.
Ante estas palabras, Puy asegurou que o feminismo e a loita contra a violencia de xénero si estivo presente na convención, coa realización de mesas "específicas" sobre o tema.
"A señora Pontón está encantada con dicir cousas que non son verdade. Nós estamos neste Parlamento intentado chegar a un acordo galego contra a violencia de xénero. Creo que con isto non é necesario facer ningunha valoración máis", sentenciou o portavoz popular.
Así mesmo, o portavoz de En Marea, Luís Villares, tamén se referiu á convención para instar o presidente galego a que "deixe de vestirse de centrista".
"A bandeira española dos recortes, dos privilexios dos ricos, só tapa a parte dereita o corpo; a outra parte do corpo queda espida", indicou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.