Gonzalo Caballero nega ter relación coa orixe dos datos sobre o 'enchufe' da cuñada de Carmela Silva
A plataforma Xuntos Actúa sinala que a información que permitiu presentar a denuncia "saíu do propio PSOE" e sinala directamente ao secretario xeral do PSdG e ao exalcalde de Vigo, Carlos Príncipe
Por E.P. | SANTIAGO DE COMPOSTELA | 14/02/2019 | Actualizada ás 14:53
O secretario xeral do PSdeG, Gonzalo Caballero, insistiu en que "non tiña maior información para dar ou deixar de dar" da que figuraba nos medios de comunicación sobre o 'enchufe' da cuñada da concelleira viguesa e presidenta da Deputación de Pontevedra, Carmela Silva, no Concello da cidade olívica.
Así se pronunciou este xoves ao ser preguntado nunha rolda de prensa sobre as declaracións da plataforma Xuntos, que asegurou que a información que lle permitiu presentar a denuncia inicial polo 'enchufe' de V.F.B. "saíu do propio PSOE". Ademais, apuntou directamente ao secretario xeral do PSdeG, Gonzalo Caballero, e ao exalcalde socialista Carlos Príncipe.
Respecto diso, o secretario xeral do PSdeG lembrou que cando se produciron os feitos, hai dez anos, "era un militante de base" sen ningún tipo de "responsabilidade" municipal ou executiva na organización, polo que "non tiña maior información" que a que saía nos medios. Ademais, o xefe de filas dos socialistas galegos rexeitou entrar nun "debate de rumores" que, na súa opinión, "non ten ningunha relevancia política".
COMUNICADO DA PLATAFORMA
Pola súa banda, o portavoz de Xuntos Actúa, Carlos Armada, emitiu un comunicado aos medios no que asegura que se Gonzalo Caballero considera que non está a dicir a "verdade" debe acudir ao xulgado e interpor unha querela contra el.
Ademais, ratificouse nas súas afirmacións e asegurou que o que fora alcalde de Vigo polo PSOE Carlos Príncipe se puxo en contacto con eles para avisalos de que tiñan "información privilexiada" sobre a cuñada de Carmela Silva.
"Das conversacións co señor Príncipe, así como con outros afiliados do PSOE, sabemos positivamente que Gonzalo Caballero era un dos informadores de orixe", incide.
No seu comunicado, así mesmo, Carlos Armada volveu a asegurar que Carmela Silva era coñecedora do asunto e mostrou a súa solidariedade con Carlos Príncipe, quen, na súa opinión, foi "expulsado de forma inxusta e totalmente estalinista do seu partido por denunciar a corrupción interna".
