Galicia está entre as comunidades con máis risco de mortalidade por cancro de próstata
Este tipo de tumor é o máis común entre os homes en todo o mundo cunha afectación importante sobre persoas de idade avanzada.
Por Europa Press / Redacción | Santiago de Compostela | 20/02/2019 | Actualizada ás 17:00
Madrid, Tarragona, Barcelona, Alacante e Murcia son as rexións españolas que menor risco de mortalidade por cancro de próstata tiveron entre os anos 2010 e 2014, mentres que as que máis o tiveron foron as zonas de Galicia, Asturias e País Vasco, o suroeste de Andalucía e Granada, e nunha longa franxa que se vai desde os pirineos ata o norte de Valencia.
Así o di un novo estudo levado a cabo por membros do CIBERESP no Centro Nacional de Epidemiología (CNE-ISCIII) e na Universidade de Granada, en colaboración co Servizo de Urología do Hospital Universitario de Fuenlabrada de Madrid. No mesmo, móstrase que a localización xeográfica das defuncións por cancro de próstata en homes con menos de 65 anos é distinta que a dos homes de máis idade.
O cancro de próstata é o segundo tumor máis común entre os homes no mundo, e afecta sobre todo a persoas de avanzada idade. A maioría dos diagnósticos corresponden a tumores indolentes e con moi bo prognóstico, aínda que outros enfermos presentan tumores máis agresivos que chegan a causarlles a morte.
Así mesmo, unha pequena parte destes cancros letais danse en homes relativamente novos e, de feito, algúns investigadores consideran que estes casos poden ter factores de risco algo diferentes aos dos homes máis maiores.
Neste sentido, cando se analizaron as mortes en homes máis novos (menos de 65 anos), o patrón xeográfico é diferente, xa que o exceso de risco observouse só en noroeste de España e no suroeste de Andalucía. Estas diferenzas apoian a hipótese, a xuízo dos expertos, de que pode haber factores diferentes implicados no cancro de próstata agresivo en homes máis novos e en homes de máis idade.
Doutra banda, analizando a distribución xeográfica do número de hospitalizacións por cancro de próstata, non se detectou unha clara diferenza por idade, pero si un patrón norte-sur máis marcado que na mortalidade. En concreto, ao comparar mortalidade e hospitalizacións, observouse que Madrid e Barcelona tiñan taxas elevadas de admisión hospitalaria e baixa mortalidade, e o contrario no suroeste de Andalucía, con elevada mortalidade e baixas taxas de hospitalización.
A xuízo dos expertos estes contrastes poderían deberse a múltiples razóns como, por exemplo, diferenzas de rexistro ou variación na práctica clínica entre rexións. "Con todo, este tipo de investigacións son só xeradoras de hipóteses e non permiten profundar nas causas dos patróns", resolveron os expertos.
