Por Europa Press / Redacción | SANTIAGO DE COMPOSTELA | 26/02/2019 | Actualizada ás 11:37
A pensión media en Galicia subiu un 5,9% en febreiro deste ano en comparación co mesmo mes de 2018 ata situarse en 834,91 euros, segundo os datos do Ministerio de Emprego e Seguridade Social publicados este martes, pero segue á cola do estado.
Deste xeito, a pensión en Galicia é a segunda máis baixa entre comunidades, só por encima da cifra de Estremadura (820,17 euros) e uns 150 euros por baixo da media española (985,16 euros).
Por provincias, a pensión máis alta na Comunidade está na Coruña, con 878,80 euros; seguida de Pontevedra (876,43 euros); Lugo (742,61 euros); e Ourense (721,11 euros).
O número total de pensións na comunidade galega alcanzou as 765.303, un 0,6% máis en relación co mesmo mes do ano anterior e representa o 7,9% das do conxunto do Estado. Delas, 298.399 están na Coruña; mentres hai 241.621 en Pontevedra; en Lugo son 116.766 e en Ourense son 108.517.
En canto a tipo de pensións, de xubilación contabilizáronse 478.406 na Comunidade no segundo mes do ano, cuxo valor medio foi 948,27 euros. As pensións de viuvez, un total de 186.928, ascenderon a 597,18 euros de media; as de incapacidade permanente, 69.892, situáronse en 872,55 euros; as de orfandade, 23.608, en 397,20 euros; e as en favor de familiares, 6.469, en 512,21 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.