A quen lle interesa que non se cree unha fiscalía anticorrupción en Galicia?

A Asociación Profesional Independente de Fiscais (APIF) realizou unha carta aberta á fiscal xeral do Estado, María José Segarra, na que denuncia o seu "abandono" na creación dunha fiscalía anticorrupción en Galicia.

Neste escrito, con data do 11 de marzo, critican que esta reclamación leva "anos sobre a mesa", pero mostran a súa preocupación pola "desidia en executar algo tan simple e que non require nin un céntimo de gasto".

Pon como exemplo desta situación a acta realizada por Inspección á Fiscalía Provincial da Coruña na que se afirma que "a ausencia de resultados na loita contra a corrupción é patente: non hai presos por causas de corrupción, nin provisionais nin sentenciados, non hai cultura de recuperación de activos procedentes do delito, non hai unha relación destacable coa Policía Xudicial".

A este respecto, APIF lamenta que nun Consello Fiscal de outubro solicitouse a creación dunha praza de fiscal delegado para anticorrupción en Galicia, pero posteriormente o fiscal xefe inspector asegurou en febreiro que esa redacción "foi obxecto de corrección" polo que non se tratou de "un acordo formal".

Por iso, non cren "de recibo" que esta cuestión "quede novamente parada". "Máxime cando un dos grandes corpos policiais manifestoulle ao noso delegado na Coruña que teñen a intención de adscribir un grupo á investigación deste tipo de delitos, unha oportunidade de valor organizativo incalculable, que se está deixando pasar".

De tal forma, apunta a escasos resultados en asuntos incoados e número de sentenzas na Comunidade no último ano, mentres censura que na memoria da Fiscalía Superior de Galicia de 2018 "nada se refire sobre outra cuestión capital: se se están recuperando ou non activos patrimoniais procedentes da corrupción".

Viñeta - Hermanager - Corrupción como a merda