Por Xurxo Salgado | A Coruña | 11/03/2019 | Actualizada ás 14:05
Hola @playaclubcoruna Mi hijo, que nació en Africa, me dice que ayer no le dejasteis entrar. Pudieron entrar todos sus amigos menos el por unas “nuevas normas” sobre algún “tipo de personas”. ¿Alguna explicación?
— Jorge Espada (@e_jem) 10 de marzo de 2019Unha das barras do Playa Club Coruña | Fonte: estrellagalicia.es
Este foi o tuit que publicou hai un día Jorge Espada, o pai dun mozo de 20 anos de orixe africana. Un tuit que en menos de 24 horas tivo xa máis de 5.000 retuits e que xerou unha morea de comentarios nas redes sociais.
Jorge Espada o único que pide é que este coñecido local da Coruña lle explique por que o pasado sábado lle prohibiu a entrada ao seu fillo, de pel negra, no local alegando “nuevas normas”. Polo momento, e a pesar dos milleiros de comentarios en redes, este establecemento segue sen dar resposta.
Segundo relata este pai a Galicia Confidencial, o seu fillo quixo entrar con outros amigos no Playa Club, pero foi rexeitado polo persoal de seguridade. “A súa indumentaria era igual que a do resto dos seus amigos así que a escusa non era nin polo seu estado, nin pola súa roupa”, apunta. “ A única explicación que recibiu foi que, cos novos propietarios, cambiaron as normas e que había xente que non podía entrar”, engade ao salientar que antes nunca tivera ningún problema para acceder a ese sitio.
Esa foi a escueta respota que recibiu o rapaz, a pesar da súa insistencia e a dos seus amigos por coñecer que motivos eran eses. O persoal de seguridade mantivose nas súas e impediu a súa entrada. Os amigos entón decidiron chamar á Policía para denunciar a situación, aínda que ningún efectivo acudiu ao lugar, segundo relata o pai. “O que lle dixeron é que tiña que presentar unha reclamación”, indica.
“El ten 20 anos agora. É fillo noso desde que tiña 14. Temos tres fillos e non tivo ningún problema nunca. É un rapaz normal, coma calquera outro. Gústalle saír de marcha, pero evita os problemas”, suliña Jorge Espada.
Por iso, a única razón lóxica que atopa para que lle denegaran a entrada é por ser de cor negra. Por iso denunciou esta discriminación nas redes sociais e está á espera dunha respota. “Espero unha explicación do Playa e non aspiro a máis. Quero tamén saber a súa versión, pero senón hai resposta presentarei unha denuncia”, advirte. De feito, xa se puxo en contacto cun avogado.
O CONCELLO PIDE QUE SE INVESTIGUE
Respecto diso, o Concello da Coruña, pediulle á Policía Local que investigue o acontecido e púxose a disposición do pai. Tamén ratificou que, noutros casos, si recibiron denuncias por racismo nalgúns locais de lecer da cidade, a través do Observatorio de Racismo e Xenofobia que teñen constituído, pero sinalou que, neste caso concreto, están á espera de poder falar tamén cos responsables do establecemento.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.