Morren 91 persoas pola gripe en Galicia
Galicia rexistra 91 falecidos con gripe desde o inicio da tempada, dos que 47 estaban vacinados.
Por E.P. | SANTIAGO DE COMPOSTELA | 22/03/2019 | Actualizada ás 09:57
Galicia rexistrou 91 falecidos con gripe --dos que 55 morreron polo virus-- desde o inicio da tempada. Deles 44 non estaban vacinados e 47, si. Así o reflicte o décimo noveno informe de 'Vixilancia da gripe en Galicia' que publica o Sergas, recollido por Europa Press, no que se concreta que no que vai de tempada houbo 55 mortos por gripe e 36 falecidos máis co virus.
No documento indícase que desde o inicio da tempada e ata as 8,10 horas do xoves 21 de marzo declaráronse 1.942 ingresos dos que 1.631 xa recibiron o alta. Ademais, sinala que do total, 121 requiriron asistencia en UCI e dos 1.705 que tiñan indicada a vacina, 826 non a recibiron.
O Sergas explica no informe que, segundo os rexistros de gripe en Atención Primaria, constátase "un descenso respecto da semana anterior" e a actividade gripal sitúase "nun nivel de intensidade por baixo do limiar epidémico". En canto ás chamadas ao 061 por gripe e infeccións respiratorias agudas (IRA), nesta semana apreciase "un descenso respecto da semana anterior".
MOSTRAS
Nesta última semana analizáronse un total de 543 mostras para os virus da gripe, das que 123 resultaron positivas para o virus da gripe A e dúas para o B.
Segundo explica o Sergas no informe, os datos achegados pola vixilancia microbiolóxica, e tendo en conta os niveis provinciais da intensidade da actividade gripal, "pásase a unha difusión xeográfica local", con "intensidade basal" e "tendencia decreciente".
