O PP de Santiago propón reordenar o tráfico en San Caetano con dúas grandes rotondas
O candidato popular en Santiago, Agustín Hernández, indicou que a súa proposta permitiría eliminar ao redor de 28 semáforos, conservando só os dos pasos de peóns.
Por E.P. | SANTIAGO DE COMPOSTELA | 28/03/2019 | Actualizada ás 13:56
O candidato do PP á Alcaldía de Santiago, Agustín Hernández, presentou este xoves unha proposta de "reordenación" do tráfico na zona de San Cateano coa creación de dúas grandes rotondas que darían "fluidez" a unha zona que considera "punto crave" da cidade.
Nunha rolda de prensa na sede do PP local, o popular indicou que esta é unha das propostas que levará no seu programa para mellorar a situación da cidade, neste caso no relativo ao tráfico rodado.
En concreto, Hernández explicou que a Avenida de San Caetano é "unha das primeiras imaxes que moitos visitantes teñen de Santiago", unha área que presenta agora "conxestión" de tráfico" e pouca "fluidez" por mor da configuración con dúas rotondas partidas e varias cruces.
Fronte a iso, Agustín Hernández propón a creación de dúas grandes "prazas" nos extremos da Avenida de San Caetano, con dúas rotondas de grandes dimensións (uns 70 metros de diámetro) que "mellorarían a situación do tráfico" e "facilitarían" o tránsito "sen perder ningún movemento".
Ademais da mellora estética, o candidato popular indicou que a súa proposta permitiría eliminar ao redor de 28 semáforos, conservando só os dos pasos de peóns. Esta solución "sinxela", daría unha "imaxe absolutamente diferente ao entrada norte da cidade", cun investimento de entre 800.000 e 900.000 euros para a que prevé solicitar a colaboración da Xunta.
