Buscarán no cemiterio ourensán de Beade os restos de dous represaliados do franquismo
A Asociación para a Recuperación da Memoria Histórica ten programadas outras dúas intervencións de fosas do franquismo para este ano en Ourense, para as que xa se están tramitando permisos
Por Europa Press / Redacción | SANTIAGO DE COMPOSTELA | 29/03/2019 | Actualizada ás 19:37
Despois dun período de recompilación de investigación e grazas á colaboración dos veciños, a Asociación para a Recuperación da Memoria Histórica determinou o lugar onde pode estar enterrado o último alcalde republicano de Amoeiro (Ourense) e outro veciño desta localidade, ambos os dous asasinados por un grupo de falanxistas o 25 de agosto de 1936 e enterrados nunha fosa común extramuros entón do cemiterio de Beade.
Segundo explicou a asociación, o alcalde Castor Sánchez refuxiouse nunha casa-taberna propiedade doutro concelleiro na a zona de Rouzós e, posteriormente, escondeuse na casa do seu sogro en Souto. A súa intención era fuxir a Portugal, pero non o conseguiu, xa que o 25 de agosto foi asasinado xunto ao seu veciño Antonio Pérez na estrada de Carballiño a Ribadavía, no cruzamento da que conduce de Beade a Beariz.
No momento da aparición dos corpos tiroteados, o Xulgado de Ribadavia xerou unhas dilixencias co fin de identificar ás dúas vítimas, un expediente que "daría moitas pistas da localización exacta da fosa común", pero que "non foi localizado" no Arquivo Histórico Provincial. Posterior ás dilixencias abertas, os corpos foron enterrados nunha zona anexa ao cemiterio, que a ampliación posterior incluíu no cemiterio.
A maiores, a ARMH ten programadas outras dúas intervencións de fosas do franquismo para este ano en Ourense, para as que xa se están tramitando permisos. Unha delas será en Mosteiro de Ribeira, en Xinzo de Limia, onde se poderían atopar os restos de Salud Torres e María del Valle. A outra intervención, prevista para agosto, sería en Celeiros-Chandrexa de Queixa, onde se pretende exhumar os restos do guerrilleiro antifranquista Benigno Fraga Pita 'O Alejandro', abatido pola Garda Civil o 28 de abril de 1949.
A ARMH interveu en máis de 30 fosas comúns en Galicia desde o ano 2003 e devolveu os restos de 57 vítimas da ditadura franquista aos seus familiares. A última intervención levada pola Asociación, que se fundou no ano 2000 despois da exhumación de 13 homes en Priaranza del Bierzo, foi en Paramos, preto de Santiago de Compostela, en 2016.
