Marta Rivera cre que Ciudadanos está "máis estruturado" en Galicia e aposta por un pacto co PP
Indicou que o seu partido dixo "desde o primeiro momento" que non pode pactar "cun PSOE que está entregado ao separatismo".
Por E.P. | SANTIAGO DE COMPOSTELA | 29/03/2019 | Actualizada ás 20:02
A candidata de Ciudadanos a deputada no Congreso pola Coruña Marta Rivera de la Cruz destacou este venres que un acordo de Goberno entre o Partido Popular e a organización laranxa sería "a única alternativa a un Goberno de Pedro Sánchez cos separatistas" e subliñou que Ciudadanos está "máis implantado, máis estruturado e ten as ideas moito máis claras" en Galicia e no resto de España en comparación coas anteriores eleccións de 2016.
Segundo destacou Rivera, "a situación é a que é", polo que a alternativa a esa coalición sería "un Goberno do PSOE cos separatistas, un Miquel Iceta liderando o partido en Cataluña e ofrecendo un referendo e falando co separatismo".
"A min a idea dun Goberno apoiado polos separatistas non me gusta nada, porque sabemos perfectamente como vai acabar. A única alternativa a iso é esa coalición que ofreceu Albert Rivera ao PP e a Pablo Casado e esperamos que teñan a suficiente responsabilidade para tomala en serio", indicou a cabeza de lista de Cidadáns pola Coruña.
Neste sentido, indicou que o seu partido dixo "desde o primeiro momento" que non pode pactar "cun PSOE que está entregado ao separatismo, que foi apartando a aqueles socialistas cos que era moito máis fácil empatizar e traballar". "Prefiro pensar que os números nos van dar a nós", explicou Marta Rivera, quen lamentou que "non se vexan moitos mecanismos para concordar nada con este PSOE".
LISTAS
Preguntada sobre a renovación do 100% das listas de Ciudadanos en Galicia para as próximas eleccións xerais, Rivera apuntou que a situación do partido é "moi distinta" á de hai case catro anos e restou importancia a esta situación xa que "as listas renováronse en todos os partidos".
"O partido está moito máis implantado, máis estruturado e hai ideas que están moito máis claras, entón creo que a militancia, que ao final é quen ten que estar contenta, está contenta con estas candidaturas", destacou. Así, indicou que ve "o ánimo moi arriba" e "moito optimismo". Ademais, asegurou que o 28A vai marcar "o futuro de España, de Galicia e das cidades".
INCIPIT
Este venres, Marta Rivera acudiu en Santiago ao Instituto de Ciencias do Patrimonio (Incipit), que depende do Consello Superior de Investigacións Científicas (CSIC), para reunirse cos seus responsables. Neste sentido, sinalou que é "interesante" que centros de carácter nacional, como o Incipit, que están fóra de Madrid "se repartan por diferentes lugares de España".
"Quero saber en que están a traballar agora, se están tendo un apoio orzamentario, porque evidentemente a investigación é un dos futuros da universidade. É un sector que debería estar en alza, polo que nós apostamos e gustaríame saber nese sentido como se pode axudar desde o Congreso a que funcione este sector", sentenciou Rivera.
