Morre un mozo de 25 anos nun accidente en Aranga
Por Galicia Confidencial | Aranga | 02/04/2019 | Actualizada ás 10:12
Un mozo de 25 anos de idade faleceu na mañá deste martes nun accidente de tráfico rexistrado no termo municipal de Aranga (A Coruña). A vítima tivo que ser rescatada do interior do vehículo que conducía.
Segundo informou o 112 Galicia, o accidente tivo lugar sobre as 5,20 horas na estrada N-VI, ao seu paso pola localidade coruñesa de A Castellana, na parroquia de San Lourenzo de Vilarraso.
Efectivos da Garda Civil solicitaron colaboración ao Centro Integrado de Atención ás Emerxencias para asistir a unha persoa atrapada dentro dun vehículo accidentado poucos quilómetros antes da provincia de Lugo.
Por iso, os xestores do 112 puxeron os feitos en coñecemento de Urxencias Sanitarias de Galicia-061, dos Bombeiros de Betanzos, dos membros do GES de Curtis e do servizo de mantemento da estrada.
Tras chegar ao momento, os servizos de emerxencia confirmaron que a persoa estaba falecida e que era preciso o uso do material de excarceración para a súa liberación.
Ao lugar, indicaron a Europa Press fontes sanitarias, o 061 desprazou unha ambulancia asistencial e o equipo sanitario da PAC de Curtis que confirmou o falecemento do condutor, I.V.P., de 25 anos.
