Por Europa Press / Redacción | SANTIAGO DE COMPOSTELA | 11/04/2019 | Actualizada ás 19:09
O Diario Oficial de Galicia (DOG) publicou este xoves a convocatoria para novas inclusións e actualización de méritos nas bolsas para a provisión temporal mediante interinidade de postos de traballo reservados a funcionarios de administración local con habilitación de carácter nacional das entidades locais galegas.
En decembro de 2017 foi convocado o acceso a elas: son bolsas para secretaría-intervención, secretaría de entrada e intervención-tesouraría de entrada que na actualidade seguen en vigor.
Ante "o previsible incremento de postos vacantes" nos concellos por "un importante número de xubilacións", segundo a Xunta, o Goberno galego considera "necesaria" a ampliación destas bolsas con novas inclusións.
Ademais, a presente convocatoria outorga a posibilidade de actualizar méritos aos actuais integrantes das bolsas. Como novidade, poderán solicitar a súa inclusión aqueles que posúan calquera titulación universitaria esixida para o ingreso nos corpos ou escalas clasificados no subgrupo A1.
Os interesados deberán presentar a súa solicitude obrigatoriamente por medios electrónicos a través do formulario dispoñible na sede electrónica da Xunta. O prazo será de 15 días hábiles desde este venres.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.