Outro ferido mentres tallaba unha árbore en Trazo

Un home resultou ferido este mércores mentres tallaba unha árbore no monte en Xavestre, no concello coruñés de Trazo, segundo informa o 112. Pasados uns minutos das 9,00 horas, o propio ferido chamou ao 112 para pedir axuda. Indicou que se atopaba no monte e que estaba atrapado por unha galla.

Con estes datos, os xestores de emerxencias puxeron en alerta ao 061, que desprazou de inmediato unha ambulancia e un helicóptero medicalizado ata o lugar. Tamén foron mobilizados por este accidente a Garda Civil, os bombeiros de Santa Comba, de Ordes e os efectivos de Protección Civil de Val do Dubra.

Os bombeiros confirmaron que non foi preciso excarcerar á persoa e que só colaboraron na evacuación do ferido, que foi trasladado na aeronave ata o Hospital Clínico Universitario da Coruña.

É o segundo accidente destas características en menos de 24 horas. Este martes pola noite un operario morria en Oia noutra talla de árbores.