Por E.P. | A CORUÑA | 10/05/2019 | Actualizada ás 00:25
O alcalde da Coruña e candidato de Marea Atlántica á reelección, Xulio Ferreiro, abriu campaña instando á cidadanía a escoller entre "o pasado ou o futuro", nun acto celebrado na porta de entrada ao porto coruñés.
"Fronte aos que hoxe inician unha campaña de desquite, estamos as persoas que queremos unha cidade líder que mira ao mar, unha cidade educadora que non vai permitir que se pechen as portas que abrimos este catro anos", recalcou. E é que, entre os obxectivos dun próximo mandato, citou a recuperación do bordo litoral, en alusión á desafectación dos peiraos interiores.
O alcalde e candidato á reelección subliñou que os que "apostan polo desquite son os que perderon fai catro anos", dixo en alusión ao PP. "Os que perderon as eleccións e os que perderon o poder", apostilou. "Son os que querían que non cambiase nada porque estaban moi ben como estaban", engadiu Ferreiro. Deles, dixo tamén que teñen "medo" a que Marea Atlántica gañe de novo.
Fronte ás propostas doutras formacións políticas, asegurou que o que "move" a Marea Atlántica é "o futuro". "Os barrios, as mulleres, os dereitos, a vivenda...", recalcou. "Esta noite comezamos a escribir unha historia con dous finais posibles, entre o pasado ou o futuro, escollemos xustiza social, escollemos planeta e escollemos democracia", expuxo ao contrapor o modelo de Marea Atlántica co doutras formacións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.