Un respiro mínimo á ola de calor: Mañá as temperaturas non serán tan altas
Galicia terá temperaturas algo máis baixas que as últimas xornadas, especialmente polo día.
Por E.P. | SANTIAGO DE COMPOSTELA | 01/06/2019 | Actualizada ás 19:25
A comunidade galega volveu a pasar este sábado unha xornada marcada polo sol e a calor, alcanzando máximas superiores aos 35 graos centígrados en localidades como Pantón (Lugo), onde se rexistraron ata 35,7 graos, converténdose no valor máis alto do día en Galicia.
Segundo datos de Meteogalicia, recollidos por Europa Press, entre as zonas onde se apuntaron temperaturas máis "extremas" atópase a localidade ourensá de Arnoia, con máximas de ata 35,3 graos, ou Vilamartín de Valdeorras (Ourense), que chegou aos 35 graos este sábado.
Tamén Leiro e a propia cidade de Ourense superaron amplamente os 30 graos, alcanzando os 34,9 e os 34,7 graos, respectivamente.En cando ás temperaturas mínimas, o municipio ourensán de Calvos de Randín foi o máis frío de toda a Comunidade, xa que os termómetros marcaron alí 4,1 graos ás 07,00 horas da mañá.
Xinzo de Limia (Ourense) e Vilalba (Lugo) tamén rexistraron temperaturas mínimas por baixo dos 10 graos, con 7,4 e 7,7 graos, respectivamente, do mesmo xeito que Cotobade (Pontevedra) e Zas (A Coruña), con 8,8 e 9,1 graos centígrados, nunha xornada marcada pola ausencia de choivas.
PREVISIÓN
Galicia quedará este domingo nunha situación intermedia entre altas e baixas presións, con ceos parcialmente cubertos aínda que con nubes medias e altas que non deberían impedir o paso do sol. A medida que avance o día entrarán néboas e nubes baixas polo litoral.
Segundo as previsións de Meteogalicia, a Comunidade terá temperaturas algo máis baixas que nestas últimas xornadas, en especial durante o día. Os ventos soprarán frouxos de compoñente oeste. Entre as principais cidades galegas, as mínimas oscilarán entre os 11 graos de Lugo e os 17 de Vigo, e as máximas entre os 23 da Coruña e os 30 de Ourense.
