Calculan en 13.000 os postos de traballo que se crearán coas rebaixas de verán en Galicia

As rebaixas de verán xerarán en Galicia preto de 13.250 contratos de traballo, un 10,7% máis que en 2018, segundo un estudo estudo realizado pola empresa de recursos humanos Randstad.

Este ano sitúase como o sétimo de crecemento consecutivo, superando por primeira vez as 13.000 firmas. Isto supón un 7,6% máis que a media estatal e sitúa Galicia entre as autonomías de maior crecemento. Ademais, será un aumento do 217,3% respecto de 2009.

Pontevedra e A Coruña serán as provincias nas que máis crecerá a contratación en rebaixas con respecto ao ano anterior, un 11,4% en Pontevedra e un 10,9% na Coruña. En Ourense e Lugo os crecementos son máis moderados, un 8,1% e un 6,8% respectivamente.

Os sectores máis afectados polo aumento da actividade económica xerada serán o do transporte, a loxística e o do comercio, co electrónico como o máis demandado.

Os perfís máis requiridos son os de empaquetadores, carreteiros, mozos de almacén, transportistas, comerciais, profesionais de atención ao cliente e 'contact center'.