En Marea pide unha OPE de enfermaría fronte ao contrato da Xunta "que resta dereitos"
Eva Solla presentou iniciativas no Parlamento de Galicia para que o Executivo publique unha OPE coa globalidade das prazas de enfermaría que se necesitan para dar un servizo "de calidade".
Por Europa Press / Redacción | SANTIAGO DE COMPOSTELA | 06/07/2019 | Actualizada ás 11:39
A deputada de En Marea no Parlamento de Galicia Eva Solla pediu este sábado unha Oferta Pública de Emprego (OPE) de enfermaría "adaptada ás necesidades do servizo", polo que criticou o contrato anunciado polo Goberno galego que, ao seu xuízo, "resta dereitos".
Así, segundo sinalou En Marea nun comunicado, Solla presentou iniciativas no Parlamento de Galicia para que o Executivo autonómico publique unha OPE coa globalidade das prazas de enfermaría que se necesitan para dar un servizo "de calidade". Todo iso tras o anuncio da Xunta de contratos para enfermaría denominados "de persoal eventual de continuidade".
"En lugar de mellorar as condicións e ser realistas coas necesidades do Servizo Galego de Saúde (Sergas), a Xunta pretende seguir cubrindo con contratos precarios e nalgúns casos en fraude de lei, os postos de enfermaría dos hospitais e da Atención Primaria", criticou Eva Solla, quen engadiu que este contrato "é moitísimo peor" e "xa foi rexeitado" polos profesionais médicos, porque "resta varios dereitos fundamentais do colectivo".
Entre os recortes en materia de dereitos laborais o grupo parlamentario En Marea destacou o incremento de 37,5 horas a 48 horas o cómputo semanal, así como as xornadas obrigatorias de ata 31 horas ininterrompidas e no contrato de Atención Primaria "eleva o complemento de nocturnidade e festividade".
"Ademais, as carteleiras de traballo semanal iranse confeccionando en función das necesidades do servizo e o goce de permisos e vacacións será coordinado pola xerencia de xestión integrada", lamentou Solla, polo que sinalou que isto é "totalmente incompatible" con calquera posibilidade de conciliación da vida laboral e familiar.
