Piden 9 anos para o acusado de provocar lesións nun ollo á secretaria da confraría da Pobra
A fiscal tamén pide unha indemnización de 124.000 euros para a muller, que sofre secuelas de perda de visión e incapacidade parcial para a súa actividade profesional como administrativa.
Por E.P. | SANTIAGO DE COMPOSTELA | 07/07/2019 | Actualizada ás 11:17
A Sección Sexta da Audiencia Provincial da Coruña, con sede en Santiago de Compostela, acollerá este venres, 12 de xullo, o xuízo contra o mariscador acusado de agredir a varias persoas na confraría da Pobra do Caramiñal en xuño de 2016, entre elas á secretaria á que provocou lesións nun ollo.
A fiscal pide para o acusado, S.G.S., nove anos de prisión, así como unha indemnización de 124.000 euros para a muller á que ocasionou danos no ollo que provocaron a perda de visión. Segundo o escrito da fiscal, o home presentouse "moi alterado" ás 14,15 horas do 15 de xuño de 2016 na confraría para ameazar ao vixiante con que ía ir a por el se non lle retiraba unha sanción administrativa de 500 euros.
O home empuxou ao vixiante e agrediuno con patadas, momento no que o biólogo do depósito, J.A.V.M, se interpuxo entre ambos e conseguiu levar o agresor ata a porta. Ao pensar que se tranquilizou, o biólogo soltouno e foi entón cando o procesado "se abalanzou novamente" sobre o gardapesca "lanzando unha puñada que lle rozou a parte inferior do beizo, pero que impactou no rostro da secretaria", que estaba presente na oficina e empezou a queixarse dunha forte dor no ollo dereito que sangraba "abundantemente".
Como consecuencia da agresión, a secretaria sufriu unha perforación no ollo por estalido do globo ocular, que necesitou tratamento cirúrxico e 329 días de curación. Ademais, conta con secuelas de perda de visión e con incapacidade parcial para a súa actividade profesional como administrativa.
