Cs pide ao Parlamento Galego unha declaración de condena dos "actos de odio" no Orgullo
O secretrario de Ciudadanos en Galicia, Laureano Bermejo, criticou que representantes do partido tiveron que sufrir as "agresións de radicais violentos" que trataron de "impedir" a súa presenza na manifestación.
Por Europa Press / Redacción | SANTIAGO DE COMPOSTELA | 10/07/2019 | Actualizada ás 14:42
Ciudadanos rexistrou este mércores unha petición no Parlamento galego --onde non ten representación-- para que se faga unha declaración institucional de "condena" contra o que considera "actos de odio e violencia" ocorridos na manifestación do Orgullo LGTBI de Madrid.
En declaracións aos medios ante a Cámara galega, o secretrario de Organización de Ciudadanos en Galicia, Laureano Bermejo, asegurou que o que ocorreu nesta marcha foi "moi grave" para a súa formación, que "leva participando desde sempre no Día do Orgullo".
Así, criticou que os representates de Ciudadanos tiveron que sufrir as agresións de "radicais violentos" que trataron de "impedir" a súa presenza na manifestación mediante a "intimidación e a agresión" ata o punto de que "devanditos representantes tiveron que ser escoltados pola Policía para garantir a súa seguridade".
Laureano Bermejo tamén cualificou de "inadmisibles" as palabras do ministro de Interior en funcións, Fernando Grande-Marlaska, que, segundo indicou, "pouco antes da manifestación declaraba que a política de pactos de Ciudadanos debía ter consecuencias".
Para o responsable de Organización de Ciudadanos, estas afirmacións "alimentaron o odio cara a esta formación política e deron pábulo á violencia que tivo lugar pouco despois". "Se xa de seu son completamente indignas polo sectarismo que entrañan, resultan ademais intolerables vindo da persoa que, en teoría, é responsable de garantir a seguridade de todos", manifestou Laureano, que ve as declaracións de Marlaska "incompatibles" co mantemento do seu cargo.
