A Igrexa arquiva o caso contra o deán da Catedral de Santiago acusado de abusos por un mozo

O Bispado de Mondoñedo-Ferrol informou de que a Congregación para a Doutrina da Fe decidiu o arquivo do caso contra o sacerdote José María Díaz, deán da Catedral de Santiago cando se produciu o roubo do Códice Calixtino, despois de que a Santa Sé non atopase "indicios suficientes" dos supostos abusos dos que fora acusado por un mozo que vivía na localidade mindoniense e que, segundo o seu relato, consistirían en tocamentos.

Na súa resolución, a Santa Sé afirma que, "tras un estudo atento do expediente recibido, non atopa indicios suficientes para iniciar ningún proceso administrativo ou xudicial en relación a esta causa", polo que solicita que se revoguen as medidas cautelares que se tomaron contra o sacerdote, do cal no comunicado do bispado non concreta o nome.

O Bispado de Mondoñedo-Ferrol recibiu a resolución da Santa Sé o pasado 19 de xullo, polo que o bispo procedeu a revogar as medidas cautelares e José María Díaz xa pode exercer o ministerio en público. Ademais, as partes interesadas xa foron informadas desta resolución.

INVESTIGACIÓN

No seu comunicado, o bispado lembra que o 3 de setembro do ano pasado se abriu unha investigación previa sobre as acusacións do novo, de forma que foron nomeados como delegado-instrutor e notario dous sacerdotes da diocese.

Ademais, o bispado indica que se puxo en coñecemento do denunciante os pasos que tiña que dar no proceso canónico e informóuselle da posibilidade de incoar unha causa civil.

Dita investigación concluíu o 5 de febreiro pasado e ao día seguinte o bispo decretou o seu peche, para a continuación elevar as dilixencias realizadas ante a Congregación para a Doutrina da Fe da Santa Sé, que é a instancia eclesial competente neste caso.

O bispado reitera o seu "máximo interese e firme compromiso na erradicación eficaz de calquera abuso de poder, de conciencia e sexual no seo da Igrexa" e subliña que obra "coa máxima transparencia en toda investigación e desde a colaboración coas autoridades xudiciais".

"Manifestamos a nosa vontade de acoller, escoitar e acompañar a calquera vítima que o solicite, así como a nosa intención de redobrar os esforzos en materia de prevención en aras a crear espazos seguros na diócese de Mondoñedo-Ferrol para os menores e adultos vulnerables", agrega o comunicado.