Por Walter Burns | Santiago | 28/03/2012 | Actualizada ás 08:00
Que expectativas ten Comisións Obreiras para esta folga?
O próximo 29 de marzo vaise a producir a maior mobilización social que se lembra, en contra dos peores ataques aos dereitos laborais e en repulsa á orientación ultraconservadora de aproveitar a crise para debilitar o estado social —que fomos construíndo ao longo destes últimos anos— para favorecer os intereses dos especuladores financeiros.
GC e os propios sindicatos comezaron a dar a coñecer casos de empresas que meten presión aos seus traballadores para que non vaian á folga. Se un traballador recibe estas presións, que lle recomendaría facer?
Ten que dirixirse a CCOO e expornos a situación para que podamos intervir en defensa dos seus dereitos. Estes son os casos de violencia que debesen alarmar a sociedade, e é evidente que interesa ocultalos. Os 'piquetes violentos' son os empresarios e empresarias que actúan así, e non son unha excepción.
Hai medo a perder o traballo por secundar o paro xeral?
Seguro, e é lóxico. Seica non se están empregando a fondo desde o goberno, as patronais, algúns medios de comunicación, para conseguir ese obxectivo? Se cadra se debese pór máis atención sobre esta situación, pola que un dereito fundamental recollido na Constitución, o da folga, se vulnera con toda normalidade, a pesar de que se emprega en defensa dos principais valores dunha sociedade avanzada e de progreso.
Haberá de novo manifestacións e de novo sen unión sindical, coa CIG nunha protesta e vostedes e UXT noutra. Tan diferentes son as ideoloxías das centrais para non seren capaces de chegar a un acordo de mínimos nunha data tan importante?
Contra a reforma laboral non caben nin estraños tacticismos nin cómodos maximalismos. Para CCOO, o importante é botar atrás a reforma laboral coa maior mobilización posible, e nesa tarefa estamos a coincidir coa inmensísima maioría de organizacións sindicais, en especial con UGT, e coa inmensísima maioría da sociedade civil organizada. Estamos a falar dunha mobilización tan importante que ninguén debería pretender instrumentalizala con fins propios nin para resolver posibles problemas internos da súa organización.
O Goberno de Mariano Rajoy xa deixou claro que non modificará a Reforma Laboral suceda o que suceda na folga. De que vale entón secundar o paro?
A clase traballadora é o suficientemente madura e responsable como para entender que só se conseguirá evitar a aplicación da reforma laboral coa maior mobilización social e cidadá posible. Non vai haber outra maneira, e, aínda que o for, non será o 30 de marzo cando se consiga que o goberno cambie a reforma laboral.
Se efectimanente o Goberno de España non recúa, haberá máis folgas xerais?
Despois do 29 de marzo debemos seguir en mobilización permanente e sostida ata conseguir o obxectivo
Hai novidades sobre os recursos dos servizos mínimos fixados pola Xunta?
Hai, si. O día 28 de marzo, o Tribunal Superior de Xustiza de Galicia convocounos a CCOO e UGT a unha unha vista para resolver a nosa solicitude de suspensión cautelar dos servizos mínimos impostos pola Xunta de Galicia, algo que nunca antes se conseguiu. Agardamos que as numerosas sentenzas contrarias aos servizos mínimos que se impuxeron noutras folgas fagan que o Tribunal os declare abusivos e obrigue o Goberno galego a que sente de novo negocialos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.