Un Círculo do Silencio que berra pola situación dos refuxiados

Este xoves na Praza de Cervantes de Santiago de Compostela celebrouse o Círculo do Silencio, unha iniciativa de acción pacífica organizada pola Rede Galega de Apoio ás Refuxiadas. Esta funciona dun xeito horizontal e está formada por setenta organizacións e activistas galegos. Levan concentrándose o primeiro xoves de cada mes desde o mes de febreiro no mesmo lugar para denunciar a situación dos refuxiados e das persoas que pereceron na denominada Ruta do Mediterráneo.

Unhas corenta persoas reuníronse en torno a unha representación gráfica do Círculo para estar vinte minutos en silencio para conmemorar o drama dos refuxiados. Anteriormente, realizouse unha intervención en prol de que o Goberno español tome medidas a favor dos refuxiados, se eliminen os CIES e na que se expresou unha repulsa ás ideoloxías racistas. “Isto xurdiu para dar visibilidade a toda a problemática actual que existe en torno aos refuxiados, polo tanto tamén ofrecemos información á xente que pasa pola rúa”, explica Isabel Rey, membro da Rede e colaboradora da FIS (Fundación Internacional de Solidaridad da Compañía de María).

A súa visión dos meses nos que se leva organizando a acción é moi positiva: “Estamos moi contentos. Xa non pola xente que conseguimos reunir todos os meses, senón polas persoas que se suman das que están a pasar pola rúa. Tamén polo movemento que provoca o Círculo do Silencio en medios de comunicación e redes sociais.”. Destaca especialmente a difusión dixital da iniciativa “xa que da unha imaxe real de que existe unha actividade permanente”.

A LISTAXE DA INDIGNACIÓN

Ao carón da representación gráfica do Círculo atópase unha listaxe oficial das 35.597 persoas que faleceron na ruta do Mediterráneo a data de decembro do 2018 elaborada por UNITED for Intercultural Action, unha rede europea contra as ideoloxías xenófobas e que brindan apoio a inmigrantes e refuxiados. “Nalgúns casos están identificados e noutros non”, indica Rey. “Parécenos moi importante estender a lista dun xeito tanxible porque moitas veces se tende a abstraer o problema”.

A activista bota a culpa da situación directamente ao Goberno: “Realmente España, un país democrático, está a incumprir os Dereitos Humanos por non deixar entrar a persoas que foxen dunha guerra”, en referencia aos máis de seis millóns de persoas que levan saído de Siria durante os últimos anos. “Ademais é surrealista e indignante a situación que se está vivindo na actualidade, xa que asinamos traer a dezasete mil refuxiados e soamente se deixou entrar a dous mil e pico”.

Rey considera a acción como temporal porque a súa esperanza é que a razón pola que se organiza deixe de existir. “Queremos que as políticas cambien e o único xeito é conseguir unha presión social suficiente para logralo, non hai outra forma”, explica. “Aínda que é moi lamentable ter que facer todo isto para que os políticos cumpran algo tan básico como respectar os Dereitos Humanos”, remata a activista da FIS.