Por Galicia Confidencial | SANTIAGO DE COMPOSTELA | 13/09/2019 | Actualizada ás 12:30
A portavoz nacional do BNG, Ana Pontón, dixo este venres, sobre a proposta do presidente da Xunta, Alberto Núñez Feijóo, de propoñer a Pedro Sánchez unha coalición de goberno PSOE-PP ou un pacto de lexislatura, que se o mandatario galego "quere apoiar a Pedro Sánchez teno moi fácil".
En rolda de prensa, Pontón incidiu en que "se Feijóo quere apoiar a Sánchez teno moi fácil; se Feijóo é o presidente que manda no PPdeG pode dicirlle aos seus deputados e deputadas que apoien a Sánchez".
"Se o fai -engadiu- eu pediríalle que polo menos non o faga gratis, senón que teña algunha contraprestación para Galicia; podería pedirlle que, por exemplo, desbloquee os 700 millóns de euros, que haxa un estatuto das electrointensivas, que solicite a transferencia da AP-9 e o fin da estafa das peaxes, ou un modelo de financiamento para Galicia", afirmou a nacionalista.
Para Pontón, "todo isto non é máis que un novo capítulo na desesperación de Feijóo por facerse notar, que vai de ocorrencia en ocorrencia e facéndose emendas a si mesmo".
A dirixente do BNG cre que se está #ante un escenario político "no que imos ir case seguro a eleccións", e, de ser así, cre que Galicia "ten unha oportunidade e os galegos e galegas téñeno que reflexionar, porque é o país que máis necesita ter unha voz propia en Madrid".
Expuxo que para a comunidade autónoma "hai temas importantes nos que nos xogamos centos de postos de traballo, nos que nos xogamos temer un financiamento xusto para o noso país, o futuro do noso medio ambiente".
"Na actual tesitura Galicia non existe no Estado, e cando non existimos non hai solución para os nosos problemas. Se algo saben os galegos e as galegas é que cando o BNG está, Galicia ten unha voz que a defenda".
A actual situación de bloqueo político é considerada por Pontón "unha irresponsabilidade", e cre que "PP e PSOE seguen incidindo nunha idea moi perigosa como é o descrédito da política".
Advertiu Ana Pontón ao presidente en funcións Pedro Sánchez de "que teña coidado coas enquisas", e que reflexione o que lle ocorreu ao PSOE en Andalucía ou a vitoria de Donald Trump en Estados Unidos. "Pensar no que din as enquisas non deixa de ser unha irresponsabilidade e unha maneira de non ter en consideración o que votaron as persoas", manifestou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.