Por Paco Gallego | Vigo | 14/05/2012 | Actualizada ás 00:48
O pasado 16 de marzo celebrouse no Centro Ágora da Coruña o I Encontro Galicia en Coworking, do que GC Tendencias de Galicia Confidencial deu conta nunha reportaxe realizada desde a participación proactiva no evento. Foran daquela catro horas intensas en xornada única de tarde. Este é o álbum fotográfico do I Galicia en Coworking.
Para coñecer todo o que envolve a segunda edición do Galicia en Coworking, que se celebrará o próximo 8 de xuño na cidade de Vigo, entrevistamos tanto ao seu fundador e impulsor a través da rede social Linkedín, Manuel García de NikoNiko Mobile, como á persoa responsable de todos os aspectos concernentes á parte organizativa desta cita, Rocío Vázquez de Luz Verde Eventos y Comunicación.
O lugar escollido para esta entrevista é The Room. Dividida en cinco seccións, a súa actividade vai dende a creación dun espazo de coworking e de servizos profesionais externos -coworking room- ata a celebración de eventos propios ou alleos -eventsroom-, a formación especializada -schoolroom-, a realización de presentacións -showroom- ou o goce de acontecementos gastronómicos. Está situada no acceso á Cidade Vella da Coruña, ao lado da Praza de María Pita, contando con dúas entradas: unha dende a rúa Santiago e outra dende a Praza dos Anxos.
GC Tendencias: Cando se celebra o II Encontro Galicia en Coworking?
Rocío Vázquez: Celebrarase o próximo 8 de xuño no Hotel Carrís Beiramar de Vigo, a carón do Pazo de Congresos novo a carón do Porto. Ten un fácil acceso tanto en vehículo privado como en transporte público.
GC Tendencias: Por que este hotel en concreto?
Rocío Vázquez: O Hotel Carrís Beiramar é un dos colaboradores e patrocinadores do evento. Poñen á nosa disposición o seu salón "Lodeiro", que é un espazo luminoso que conta con dúas paredes acristaladas e acceso a terraza -para fumadores/as, por exemplo-. Atlántica Arte, outro dos patrocinadores do evento, amosaranos unha exposición sorpresa dun dos mellores pintores galegos do momento.
Manuel García, de NikoNiko Mobile e fundador do Galicia en Coworking durante a nosa entrevista
GC Tendencias: Que é Galicia en Coworking?
Manuel García: Que qué é Galicia en Coworking? A idea naceu porque se necesitas clientes para a túa empresa, entón pensas cal pode ser a forma máis rápida de que os clientes se acheguen a ti. Mediante unha aplicación web, e a través da rede social Linkedín, poderás programar ata un máximo de vinte citas de sete minutos de duración que se teñen que desenvolver durante a mañá. A puntualidade das accións é fundamental. Logo teremos a pausa para a comida e, xa de tarde, poderás repetir ata tres das citas da mañá que considerases máis interesantes. Nesta ocasión si que se contará cun tempo maior.
GC Tendencias: No primeiro Galicia en Coworking abriuse a xornada con dúas breves ponencias doutras tantas empresas moi diferentes mais tamén moi intreresantes. Como unha especie de aperitivo...Tedes pensado algo semellante para esta ocasión?
Manuel García: Neste segundo encontro comezaremos por dous ponentes, Pepe Solla de Retaurante Solla e Marga Borreguero de Fundación FEDYS, Deporte y Salud, e posteriormente a estas ponencias, moi áxiles, desenvolveranse as correspondentes citas programadas.
GC Tendencias: A primeira edición desenvolveuse só de tarde, pero esta conta con xornada partida...
Rocío Vázquez: Atendendo ás múltiples persoas, eu incluída, que consideraron que as catro horas de duración do primeiro encontro foran máis ben escasas, decidimos alongar esta edición. Pola mañá serán as reunións e, logo do parón da comida, que se pode facer nunha das salas do Hotel por 17 euros, IVE incluído, teremos estas citas extra que vos comentaba Manuel. Serán todas estas moi boas oportunidades de irmos facendo contactos e pechando negocios, que é do que se trata neste Galicia en Coworking.
GC Tendencias: Estreades novo logo...(ver encabezado)
Manuel García: Si. É obra de Daniel Ameneiros. Leva as cores de Galicia, azul e branco, e ademais unha frecha apuntando cara arriba en sentido positivo. O primeiro deseño foi meu e empregaba varias bombillas que se sumaban para formar unha máis grande, como unha suma de ideas. De todas formas, o desta edición está moitísimo mellor.
GC Tendencias: Por que debe alguén apuntarse e participar nesta xornada e como poderá inscribirse?
Manuel García: Porque é un evento aberto a todos os sectores, é unha grande experiencia, aforrarán custes e coñeceran a persoas que nin se imaxinaban que ían coñecer. É certo que o sector da comunicación e tecnoloxía tivo ata agora unha presenza moi protagonista, pero é bo que se acheguen persoas doutros sectores. Esa é unha das razóns, por exemplo, polas que se fixo unha aposta por ponentes alonxados deses sectores. A inscrición ao evento poderá facerse a partir do 17 de maio, Día das letras galegas, na nosa páxina web www.galiciacoworking.org. Estamos traballando na aplicación para sacala ese día tan especial.
Entrada ao novo espazo The Room, onde se desenvolveu esta entrevista, desde a Rúa de Santiago (A Coruña)
Poderedes seguir as novidades deste evento nas nosas contas @GcTendencias de twitter e GC Tendencias de facebook.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.