Comezan as obras para a nova conexión das estradas N-120 e N-536 que servirá de circunvalación a O Barco
Búscase evitar o tránsito de camións cargados de lousa así como doutros vehículos pesados polo centro da localidade.
Por E.P. | OURENSE | 25/09/2019 | Actualizada ás 16:52
O Ministerio de Fomento iniciou esta semana as obras de conexión entre as estradas N-120 e N-536 entre Sobradelo e O Barco de Valdeorras, na provincia de Ourense. Esta actuación ten un orzamento de 47,2 millóns de euros.
Segundo informou Fomento nun comunicado, a obra consiste en executar unha "conexión rápida e segura" das estradas N-536 e N-120 nas proximidades do Barco de Valdeorras, que sirva, ademais, como variante de poboación "para evitar o frecuente paso dos camións de lousa procedentes das canteiras próximas e do resto de vehículos a través do seu núcleo urbano", concretou. "Mellórase así as características xeométricas do trazado da N-536, a seguridade viaria rodada e peonil, e as comunicacións de toda a comarca de Valdeorras", destacou Fomento.
As obras, cunha lonxitude aproximada de 5,6 quilómetros, inícianse en Sobradelo no quilómetro 41,5 da N-536 na intersección coa OU-122 e finalizan no punto quilométrico 453,4 da N-120 no Barco de Valdeorras.
Ao longo do trazado construiranse un total de 10 estruturas: cinco viadutos, catro pasos superiores e un paso inferior, onde destacan o viaduto sobre o río Sil de 461 metros de lonxitude, que tamén salva o FF.CC. e a estrada OU-0801 de Entoma e o viaduto do río Cigueño, de lonxitude 347 metros. Baixo o monte de Ou Serro, proxectouse a construccion dun túnel dun único tubo bidireccional, de 490 metros de lonxitude e pendente longitudinal constante do 3%.
"Como parte importante das obras, cabe destacar que inclúe todas as medidas necesarias de integración ambiental e protección do patrimonio cultural da antiga "Ponte de Candis", explica Fomento, da "explotacion aurífera romana da Veiga" e a creación dun paseo peonil e vía ciclista segregada ao longo da N-536", finalizou Fomento.
