Galicia é a sexta comunidade con menos mobilidade xeográfica dos seus parados
O 2,4% dos ocupados galegos cambiou de municipio no último ano.
Por Europa Press / Redacción | SANTIAGO DE COMPOSTELA | 27/09/2019 | Actualizada ás 18:49
Galicia é a sexta comunidade con menor mobilidade xeográfica entre os seus parados, xa que o 82,4 por cento dos traballadores nesa situación non cambiou de municipio de residencia en polo menos cinco anos, segundo datos publicados este venres polo Instituto Nacional de Estatística (INE).
Estremadura é na que menor mobilidade hai (o 90,3% dos parados non se mudou), seguida de Andalucía, Murcia, Castela-A Mancha e Asturias. A media estatal sitúase no 81,8%. No outro extremo está Navarra (co 65%).
No tocante aos ocupados, a súa mobilidade xeográfica é do de 2,4% en Galicia —cambiáronse de municipio no último ano—, segundo as cifras do INE. A media está no 2,6%.
As comunidades autónomas onde a mobilidade xeográfica dos ocupados é máis alta son Cataluña e Madrid, onde o 3,9% e o 3,3% dos ocupados, respectivamente, cambiaron o seu municipio de residencia hai menos dun ano. Pola contra, Estremadura (1,3%), Aragón (1,4%) e Castela e León (1,6%) presentan as porcentaxes máis baixas.
