Aparece varada unha tartaruga orixinaria do Caribe no porto de Malpica

Un exemplar macho de tartaruga laúde duns dous metros de lonxitude apareceu varado no porto de Malpica (A Coruña), segundo informou o biólogo da Coordinadora para o Estudo dos Mamíferos Mariños (CEMMA) Alfredo López.

Este experto explicou que se trata dunha especie que nace no Caribe pero que se introduce nas correntes do golfo e pasa fronte ás costas galegas.

Así, asegura que esta especie adoita ser observada desde as costas galegas e en ocasións algún exemplar acaba atrapado en aparellos de pesca.

Ante a aparición deste exemplar, persoal da Cemma acudiu este martes ao porto de Malpica, onde o Concello xa retirou o cadáver coa colaboración dos biólogos.