Morre atropelado un home de 84 anos no Barco de Valdeorras
O falecido, veciño de Xagoaza, transitaba pola vía de noite sen elementos reflectores.
Por Europa Press / Redacción | OURENSE | 20/10/2019 | Actualizada ás 11:21
Un home de 84 anos de idade morreu este sábado tras ser atropelado mortalmente por un turismo no municipio ourensán do Barco de Valdeorras.
Segundo informan os servizos de emerxencias, os feitos ocorreron sobre as 20,55 horas na N-536, no quilómetro 50,500. O falecido, veciño de Xagoaza, transitaba pola vía de noite sen elementos reflectores.
Pola súa banda, o condutor do vehículo implicado, que deu resultado negativo tanto no test de alcol como o de drogas, resultou ileso.
Ata o lugar dos feitos desprazáronse patrullas da Garda Civil de Tráfico do Barco e de Verín, axentes da Policía Local, efectivos do GES do municipio e unha ambulancia do 061-Urxencias Sanitarias.
O persoal médico tentou reanimar ao octoxenario, pero xa falecera practicamente no momento do atropelo, indican fontes dos servizos de emerxencias.
