O BNG insta o goberno coruñés a esixir a Albada que cumpra "coas súas obrigacións"

O portavoz municipal do BNG no Concello da Coruña, Francisco Jorquera, instou ao goberno local a esixir a Albada --a empresa concesionaria da planta de tratamento de lixos de Nostián -- que cumpra "coas súas obrigacións" ante o conflito laboral na empresa e a súa negativa a recoller os residuos dos concellos do Consorcio das Mariñas.

Jorquera, xunto á concelleira Avia Veira, participou na protesta secundada por traballadores da planta tras o anuncio da empresa dun expediente de regulación temporal de emprego (ERTE) para o 40% do persoal a partir do 1 de xaneiro, data na que prevé deixar de recibir os residuos dos municipios do Consorcio.

Sobre este conflito, no que os traballadores demandan interlocución co goberno local, o concelleiro nacionalista asegurou que non chega con que o Consistorio herculino "impoña a Albada multas de 3.000 euros cada dous días se a concesionaria deixa de recoller o lixo aos concellos do Consorcio das Mariñas".

Por iso, instou ao goberno local a utilizar "todas as ferramentas ao seu alcance" para obrigar a empresa "a que cumpra coas súas obrigacións e non atente contra os dereitos do cadro de persoal". Ademais, indicou que o prego de condicións do contrato para a xestión da planta inclúe "a intervención, o secuestro da concesión, pór a planta baixo as ordes directivas do concello", sinalou a este respecto.

Mentres, desde a CIG denunciouse o intento da empresa, do grupo Urbaser, de aplicar "un paquete de recortes" con modificación "substancial" das condicines laborais. Tamén denuncia a "inacción" do goberno local, lembrando, ademais, a convocatoria de folga indefinida a partir do 8 de decembro.

Os concelleiros do BNG Francisco Jorquera e Avia Veira participan nunha protesta de traballadores de Albada. BNG | Fonte: Europa Press