Por E.P. | A CORUÑA | 10/12/2019 | Actualizada ás 18:14
Delegados e delegadas da CIG nas industrias electrointensivas concentráronse ante a Delegación do Goberno en Galicia para esixir "a aprobación inmediata" dunha tarifa industrial que reverta a crise das empresas deste sector.
Así o expuxo, no transcurso da protesta, o secretario xeral da CIG, Paulo Carril, quen denunciou "a inoperancia, os incumprimentos reiterados e as mentiras diarias do Goberno".
Respecto diso, asegurou que, un ano despois da publicación do Real Decreto que fixaba un prazo de seis meses para definir un estatuto para a industria electrointensiva, "non vemos tal estatuto e agudizouse a crise no conxunto do sector en Galicia".
Carril insistiu en que se pode sacar adiante este estatuto mediante un Real Decreto pola vía de urxencia "porque neste caso a urxencia está máis que xustificada pola situación agónica do sector industrial".
"Un ano despois nin hai un marco estable, predicible e competitivo nin hai tampouco unha poxa que permita, en tanto non haxa estatuto, que as empresas non estean nunha situación permanente de incerteza e mesmo de perda de postos de traballo", advertiu.
No acto, o secretario xeral da CIG avanzou que este sindicato convocará unha nova concentración o próximo 17 de decembro, ás 11,00 horas, coincidindo co proceso de poxa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.