A plataforma de autónomos contra as subas na AP-9 insta a PSOE e BNG a aplicar bonificacións antes de marzo
Advirten que convocarán mobilizacións se non se executan os acordos asinados por socialistas e nacionalistas a nivel estatal.
Por Europa Press / Redacción | SANTIAGO DE COMPOSTELA | 14/01/2020 | Actualizada ás 17:30
A plataforma de autónomos constituída para demandar rebaixas nas peaxes da AP-9 instou a PSOE e BNG a executar o seu acordo para a investidura de Pedro Sánchez como presidente do Goberno antes de que conclúa o mes de febreiro, data na que reclaman que estea en funcionamento as bonificacións do cento por cento para os usuarios que realicen un traxecto de ida e volta pola Autoestrada do Atlántico.
O colectivo no que se integran asociacións e profesionais reclama que se aplique de maneira inmediata esta medida, cuxa posta en marcha permitirá un aforro de entre 300 e 600 euros aos usuarios que utilizan a AP-9 a diario, segundo as estimacións da plataforma.
Así, aseguran que a decisión de compensar aos usuarios frecuentes da autoestrada "permitirá que miles de traballadores autónomos aforren en custos de explotación do seu negocio unha media de 4.000 euros anuais", á vez que lembran que Galicia foi "unha das comunidades onde máis traballo autónomo se perdeu en 2019".
"Non cesaremos no empeño de alcanzar os lexítimos intereses que estamos a reclamar", apuntou o presidente de Unión de Profesionais e Traballadores Autónomos e portavoz da plataforma, Eduardo Abad, que felicitou ao BNG por arrincar o compromiso do novo Goberno, á vez que avanza que tratarán "de acelerar ao máximo a consecución" das rebaixas nas peaxes da autoestrada.
