Por E.P. | SANTIAGO DE COMPOSTELA | 24/01/2020 | Actualizada ás 13:47
As negativas familiares a doar un órgano situáronse no Complexo Hospitalario Universitario da Coruña (Chuac) no 2,17%, "a menor cifra de toda a historia", segundo sinalou o coordinador de transplantes do complexo hospitalario, Fernando Mosteiro, na presentación do balance correspondente a 2019.
O ano pasado, o hospital realizou un total de 238 transplantes, dos que cinco foron infantís, menores de 16 anos. En total, houbo 109 de ril e deles 31 de doante vivo; 66 de fígado; 41 de pulmón; 20 de corazón e dous de páncreas. Ademais, houbo 106 de tecidos.
Tanto o xerente da área sanitaria da Coruña e Cee, Luís Verde Remeseiro, como o doutor Mosteiro, e o responsable do programa de transplante cardíaco, José Joaquín Cuenca, incidiron en que este número de transplantes non sería posible sen a solidariedade das familias ao doar o órgano dos seus familiares falecidos. Tamén destacaron a implicación de todos os profesionais do centro.
En concreto, de acordo cos datos facilitados, o número de doazóns de órganos realizadas no Chuac ascendeu a 76. Destas, 45 foron de doante falecido, cunha media de idade de 59,3 anos, e 31 doazóns de doante vivo. Nestas últimas, as máis habituais son entre cónxuxes, aínda que houbo casos entre pais e fillos, entre fillos e pais e entre irmáns.
Especialmente, os responsables do Chuac incidiron no importante descenso de negativas familiares, con só un 2,17%, unha taxa moi inferior á media galega (13,4%) e á media estatal (14%). Respecto diso, lembraron tamén que hai cinco anos situábanse en torno ao "28 e o 30%".
En canto ás causas deste cambio, o coordinador de transplantes do Chuac atribuíuno, entre outros motivos, ás campañas de divulgación. Por outra banda, destacou os "resultados" tras as intervencións, en referencia á pervivencia dos pacientes.
LISTAS DE ESPERA
Con todo, recoñeceu que as listas de espera para ser trasplantado "non deixan de aumentar" pola existencia dunha poboación máis maior. En concreto, no principio do ano, había no cardíaco, oito pacientes; no pulmonar, 17; no hepático, 21; no renal, 257 e no pancreático, sete.
Por outra parte, sobre os retos para este ano dixo que se centran na consolidación dos protocolos de detección de posibles doantes que non estean na UCI, en concreto a través dos servizos de urxencias e pneumoloxía; impulsar a doazón en asistolia e optimizar o aproveitamento das doazóns multiorgánicas, ademais de continuar coas campañas informativas para reducir a taxa de negativas familiares.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.