Por Europa Press / Redacción | VIGO | 29/01/2020 | Actualizada ás 13:57
A Xunta de Galicia xustificou o rexeitamento ao proxecto da mina de Touro (A Coruña) porque "primou a parte ambiental" e, tras dous informes desfavorables "insalvables", a declaración de impacto ambiental do devandito proxecto foi negativa.
Así o trasladou a conselleira de Medio Ambiente, Ángeles Vázquez, en declaracións aos medios durante unha visita ao barrio de Navia en Vigo. Segundo lembrou, na tramitación deste proxecto, dous dos informes sectoriais preceptivos foron desfavorables, o de Patrimonio Natural e o de Augas de Galicia, porque estes organismos consideran que, en caso de accidente, non está garantida a protección do patrimonio natural e dos recursos hídricos.
Así as cousas, cunha declaración de impacto ambiental negativa, deuse por concluído o procedemento e así se trasladará tanto aos concellos directamente afectados (Touro e O Pino), como á plataforma veciñal que se opón á reactivación da mina, e á propia empresa interesada en promover o proxecto.
"Con isto quero dicir que aquí só priman, como non pode ser doutro xeito, os informes técnicos por encima de todo, e o goberno galego ten a obrigación de que iso se faga cumprir", proclamou, á vez que incidiu en que "hai que facer compatible unha Galicia sustentable e o desenvolvemento económico, e aquí primou a parte ambiental".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.