Rueda aposta por priorizar a "gratuidade da AP-9" por riba da transferencia da competencia
O presidente galego destaca que a resolución "cambia o escenario" pese ao seu pesimismo sobre os prazos.
Por Europa Press / Redacción | Santiago de Compostela | 21/07/2025 | Actualizada ás 14:54
O presidente da Xunta, Alfonso Rueda, instou ao Goberno central a "ser ambicioso" e ir a por "a gratuidade da AP-9" despois de coñecerse a pasada semana o ditame da Comisión Europea que declara ilegal a ampliación da concesión da autoestrada. A preguntas dos medios, o titular do Goberno galego insistiu en que "é o momento" e "dan as contas", aínda que sinalou que non é "moi optimista".
Neste sentido, apuntou aos "atrasos e adiamentos" respecto da transferencia da autoestrada, pero manifestou que a resolución da Unión Europea coñecida a semana pasada "cambia o escenario". Así, xa avanzou que pedirán ao Executivo central que "se materialicen as operacións xurídicas que sexan necesarias" para que a AP-9 "sexa gratuíta para os usuarios".
