Xunta pide por carta ao Goberno central a creación dunha comisión de seguimento do AVE a Galicia

A Xunta remitiu unha carta ao Goberno central para pedir a creación dunha comisión de seguimento das obras do AVE a Galicia.

O escrito, dirixido ao secretario de Estado de Transportes, Pedro Saura, inclúe a demanda para crear un foro sobre a alta velocidade ferroviaria similar ao establecido con outras comunidades autónomas e que se reúna cunha periodicidade mensual.

A conselleira de Infraestruturas e Mobilidade, Ethel Vázquez, instou a activar esta medida para pasar "do terreo da incerteza ao terreo das certezas" e ter "información oficial" e "real" entre as administracións sobre a evolución da obra.

"Pedimos esa comisión, que foi atendida noutras comunidades autónomas e debe ser atendida en Galicia", sinalou, en declaracións aos medios.

Na misiva, Vázquez expresa a súa confianza en que ambas as administracións coincidan na importancia de establecer un marco de interlocución fluído e considera que as fórmulas escollidas nos últimos meses sobre a marcha das obras e a previsión de finalización non foron as máis acertadas, sobre todo polas declaracións "contradictoras" entre as datas da Comisión Europea como de representantes do Estado.