A aparición en medios de comunicación, principal motivo para a procura dunha palabra no dicionario da RAG

Os principais factores que inflúen no número de procuras dunha palabra no dicionario da Real Academia Galega (RAG) son a súa circulación nos medios de comunicación ou no mundo escolar. Así se recolle o novo número de 'Cadernos de Lingua' que, segundo informa a institución académica, analiza o que máis inflúe á hora de buscar un termo no citado dicionario.

O estudo realizouse a partir da listaxe das 50 palabras máis buscadas no dicionario en liña da RAG no ano 2017.

Nel, remárcase o uso, sobre todo, do dicionario para a procura do significado dunha palabra, pero tamén para resolver dúbidas ortográficas ou buscar sinómimos e antónimos ou "ata coñecer a realización fonética dun termo".

"Estas múltiples posibilidades contribúen ao continuo crecemento no seu uso, que en 2019 superou as 70.000 procuras diarias de media", subliña a RAG.