O Sergas quita o pago por ver televisión aos ingresados en todos os hospitais despois de dúas semanas de epidemia
A instrución sobre as televisións foi dada pola Xunta o pasado luns, 16 de marzo, pero aínda non se aplicou en todos os centros.
Por Europa Press / Redacción | SANTIAGO DE COMPOSTELA | 20/03/2020 | Actualizada ás 15:35
Dúas semanas, desde que comezou a epidemia de coronavirus en Galicia, é o que tardou o Servizo Galego de Saúde (Sergas) en decidir facilitar a gratuidade da televisión en todos os hospitais galegos que forman parte da sanidade pública e que atenden os pacientes ingresados.
Esta medida xa está implantada desde o luns en centros hospitalarios como o de Santiago, Vigo, Pontevedra, A Coruña, Hospital da Mariña e o de Ferrol. A partir deste sábado tamén se habilitarán en Lugo e Monforte, mentres que a xerencia da área de Ourense traballa para buscar a "solución técnica" que permita operar esta medida, explicou a Consellería de Sanidade.
Esta actuación enmárcase dentro das "medidas preventivas especiais" dos centros sanitarios como un xesto "complementario". Adicionalmente, o Sergas lembra que para "manter boas prácticas de prevención e contención da enfermidade", limítase o acompañamento dos pacientes a "unha soa persoa" durante a súa estancia no centro.
Con todo iso búscase "facilitar" e "mellorar" o tempo que os pacientes pasan ingresados nestes hospitais. A instrución sobre as televisións foi dada pola Xunta o pasado luns, 16 de marzo, pero non puido completarse aínda debido ás "dificultades técnicas de execución" que se presentaron nalgúns centros.
