Denuncian que a atención telefónica sobre coronavirus non se fai en galego
Máis de 2.500 firmas apoian unha campaña 'en liña' para que a Xunta ofreza información "clara e precisa" aos galegos no seu idioma.
Por Europa Press / Redacción | SANTIAGO DE COMPOSTELA | 27/03/2020 | Actualizada ás 19:40
Os teleoperadores encargados da atención telefónica á cidadanía a través do servizo despregado pola Xunta sobre o coronavirus carecen de argumentario en lingua galega. A Mesa pola Normalización Lingüística denunciou esta situación, que impide que os cidadáns que se expresen neste idioma poidan ser atendidos correctamente.
Estes traballadores que resolven as consultas da cidadanía sobre a enfermidade "teñen a obrigación de cinguirse a unha serie de puntos informativos que só teñen dispoñibles en castelán", critica a asociación.
É por iso que consideran que se trata dunha "grave limitación" do dereito dos galegos a expresarse no seu idioma coa administración e avanzan a presentación dunha queixa formal tanto á Valedora do Pobo como ás institucións sanitarias.
De momento, unha petición 'en liña' impulsada por Queremos Galegos sumou máis de 2.500 firmas en menos de 24 horas para que se tomen as medidas necesarias de cara a "preservar a integridade e saúde dos cidadáns" e se ofreza información "clara e precisa" na súa lingua sobre a epidemia.
