Por E.P. | Santiago de Compostela | 09/04/2020 | Actualizada ás 11:01
O Boletín Oficial do Estado recolle este xoves a Orde do Ministerio de Facenda pola que se reducen os Índices de Rendemento Neto aplicables en 2019 no sistema de estimación obxectiva do IRPF ou de módulos, para agricultores e gandeiros afectados por diversas circunstancias excepcionais.
Esta orde recolle a proposta do Ministerio de Agricultura, Pesca e Alimentación (MAPA) de minoración dos devanditos índices. Para aplicar a rebaixa, tivéronse en conta danos climáticos e outro tipo de adversidades, como os derivados de problemas de mercado.
A Delegación do Goberno sinala que, en Galicia, as reducións establecidas a escala estatal afectan a un amplo sector gandeiro e a producións notables dentro do seu ámbito territorial.
Así mesmo, indica que beneficia, a nivel autonómico, a agricultores dedicados a cultivos como cereais, cítricos, froiteiros, leguminosas e oliveirais, así como aos produtores de gandaría extensiva, vacún de leite e apicultura. Ademais, no ámbito provincial e municipal destaca a rebaixa nos módulos para os produtores da castaña, de pataca e de forraxes.
O Ministerio de Agricultura, Pesca e Alimentación calcula que a aplicación desta norma no sector agrario supón unha rebaixa da base impoñible da orde de 614 millóns de euros para o sector agrario, a maior cifra do último quinquenio e aproximadamente o triplo da de 2018.
Deste xeito, en Galicia, o conxunto de todas as reducións pode supor unha minoración da base impoñible duns sete millóns de euros.
O departamento que dirixe Javier Losada sinalou que tamén se aplican á campaña de módulos 2019 reducións para os agricultores que utilicen electricidade para a rega, en aplicación dun coeficiente corrector que se introduciu en 2014 e que poderán seguir aplicando sobre o rendemento neto dos cultivos regados, e que suporá unha redución dun 20% do mesmo.
Así mesmo, mantense a redución do 5% do rendemento neto calculado polo método de estimación obxectiva para 2019. Trátase dunha medida de carácter horizontal que afecta á totalidade dos agricultores e gandeiros que tributen en estimación obxectiva.
POR SECTORES
As reducións establecidas con carácter estatal para a declaración da renda 2019, para os sectores agrícolas son do 0,26 a 0,18 para cereais e cítricos; do 0,37 ao 0,3 para froiteiros non cítricos; de 0,26 a 0,18 para leguminosas; de 0,32 a 0,22 para oleaxinosas, e de 0,26 a 0,13 para o oliveiral.
Nos gandeiros, a rebaixa para o bovino de leite é de 0,20 a 0,18, para o bovino de cría extensivo de 0,26 a 0,18, para o bovino de carne extensivo de 0,13 a 0,09, para o ovino de carne extensivo de 0,13 a 0,09, para o ovino de leite de 0,26 a 0,18; para o caprino de carne extensivo de 0,13 a 0,09, para o caprino de leite de 0,26 a 0,18, para o porcino de carne extensivo de 0,13 a 0,09, para o porcino de cría extensivo de 0,26 a 0,18 e para a apicultura de 0,26 a 0,13.
OUTRAS REBAIXAS
A Delegación do Goberno destacou que outras minoracións que afectan a todo un ámbito provincial son, por exemplo, en Ourense, as reducións do 0,26 ao 0,13 para a castaña. Estas serán aplicables en 38 concellos nos que tamén se inclúe a Montaña de Lugo.
Para a pataca, do 0,26 ao 0,18 en 33 municipios, nos que figura a comarca da Costa en Lugo. Ademais, as forraxes, do 0,37 ao 0,26 en oito municipios da provincia lucense.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.