O xulgado aproba o despedimento de 120 traballadores de Isidro 1952

O Xulgado do Mercantil número 1 da Coruña dispuxo a extinción dos contratos de traballo que vinculaban á empresa concursada Isidro 1952 con 120 traballadores, segundo informa o Tribunal Superior de Xustiza de Galicia (TSXG). A maxistrada indica na resolución, de 31 de marzo, que se acreditou "a diminución persistente no nivel de ingresos ordinarios ou de vendas da empresa".

Ademais, destaca que na memoria explicativa das causas que motivan a solicitude de extinción das relacións laborais da compañía exponse cal é a situación económica e financeira da sociedade.

Nese documento tamén se pode comprobar, segundo o auto, que no exercicio 2018 as vendas reducíronse un 12,37% respecto ao ano anterior e en 2019, un 22,21%.

A xuíza lembra que LIDL, que era o principal cliente da compañía, comunicou a finais de 2017 a súa intención de diversificar a rede de provedores, o que supuxo que se reducisen os pedidos.

"O descenso do volume de vendas e da produción obriga a axustar os recursos humanos ás necesidades produtivas. Así se probou co detalle da redución de produción de bandexas, que se acomodou ás modificacións sufridas na demanda de produtos", destaca a maxistrada no auto.

O Xulgado do Mercantil número 1 da Coruña considera tamén "acreditadas" as causas económicas e produtivas que motivaron a medida colectiva interesada pola administración concursal, consistente na extinción dos contratos de traballo de 120 traballadores.

"Ademais, non hai motivos para apreciar neste caso indicio algún de dolo, fraude, coacción ou abuso de dereito", destaca a maxistrada na súa resolución.