Feijóo defende a política laboral no Sergas: "Fixemos 1.000 contratos desde o inicio do coronavirus"

Diego é enfermeiro na Atención Primaria. Leva traballando seis anos para o Sergas e, desde entón, encadeou máis de 600 contratos. “Isto é un novo modelo novo de escravitude. Somos o detrito dos eventuais”, aseguraba en declaracións a Galicia Confidencial denunciando que vive a súa vida pegado a un teléfono durante as 24 horas agardando unha chamada do Sergas.

Este medio preguntoulle este mércores, na conferencia telemáctica cos medios, sobre este sistema de contratación non que hai medio cento de persoas. A resposta de Feijóo moi elocuente. "Se hai unha Comunidade que, desde o principio, fixo unha aposta polo incremento de contratación, foi o Sergas", dixo.

Así, e sen aludir en ningún momento a precariedade laboral da sanidade pública galega, aludiu á realización de  "máis de 1.000 contratos desde que empezou a pandemia" e lembrou que, antes de que empezase a crise sanitaria, a Xunta pretendía que o Goberno "autorizase unha convocatoria pública de emprego de 5.000 prazas en 2020".

Non é a primeira vez que numerosos colectivos e sindicatos da sanidade critican a precarización das súas condicións laborais, especialmente, nas últimas semanas, tras a crise do COVID-19, con numerosos profesionais contaxiados por falta de material de protección e outros con contratos de semanas.